Nin loo qabtay inuu wax ka ogyahay qaraxii Gaarisa

Nov 5, 2012 - jawaab

Gaarisa:  Hal qof ayaa loo xiray qarax shalay subax ka dhacay magaalada Gaarisa oo loo gaystay kaniisad ku taala magaalada, wuxuu qaraxaasi galaaftay dhimashada hal askari waxaa kaloo ku dhaawacmay 14 kale, qofkaas hadda gacanta lagu dhigay waxaa la sheegay inuu  wax ka ogyahay ciddii ka dambeysay qaraxaas.

Duqa degmada Gaarisa Maxamed Maalim ayaa isagoo u warramaya warbaahinta u sheegay sidan, “Ninkaan wuxuu noo sheegay inuu arkay nin ku soo noqnoqday agagaarka kaniisadda daqiiqado kahor intuusan qaraxu dhicin. Waxaan la yaabannahay sababta uu degdeg noogu soo sheegi waayay warkaas intuusan falku dhicin”.

Maxamed, wuxuu kaloo yiri, “Waxaan aamminsanahay inuu ogyahay wax badan”.

Dadka ku dhaawacmay 11 kamid ah waa haween, laba nin iyo ilmo yar oo jira 3 bilood.

Madaxweyne ku xigeenka Kenya Kalonzo Musyoka ayaa si xooggan u canbaareeyey falkaas.

Kolonzo oo arrinkaas ka hadlay wuxuu yiri, “Aad baan kuga xumahay kuwa dambiilayaasha sida Al-Shabaab oo kale ay dadkeena reer Garisa argagax galiyaan”.

Wuu sii hadlay oo yiri, “Laakiin Allaah kaliya ayaa balaayada ka hayn kara wadankeena Soomaaliyana ka dhigi kara meel nabad ah, laakiin waa wax lagu waano qaato inaanu noqonay dad u jilicsan falalkaas oo kale meelaha aan wax ku caabudno.”

Kolonzo wuxuu hadalkaas jeediyay isagoo ku sugan bariga dalka Kenya.

Toosiye News Network, Gaarisa.